Mottudagurinn nálgast eins og óð fluga - gerum okkur glaðan dag föstudaginn 13. mars
Sjálfur Mottudagurinn er næstkomandi föstudag, 13. mars. Við hvetjum alla til að taka þátt, gera sér glaðan dag og vekja athygli á baráttunni gegn krabbameinum í körlum.
Mottumarslagið 2020 er frábær hreyfisöngur sem minnir okkur á forvarnargildi þess að hreyfa okkur og leggja áherslu á heilbrigðari lífsstíl. Hvernig væri að koma saman, dansa, syngja og leika eftir hreyfingarnar í laginu?
Takið myndir og deilið með myllumerkinu #mottumars og sendið okkur á netfangið mottumars@krabb.is.
Eftir að okkur bárust kvartanir um að Mottumarsmottur hefðu eyðilagt fermingarmyndir fjölskyldunnar og jafnvel vakið óþarfa deilur milli hjóna var ákveðið að hætta að hvetja til mottusöfnunar.
En nú geta allir tekið gleði sína á ný og verið með rafrænu mottu. Prófaðu nýja Mottumarsfilterinn á Instagramsíðu Mottumars og deildu með okkur þinni mottu með því að merkja myndina @Mottumars.
Hvetjum vini, vandamenn og samstarfsfélaga að taka þátt í átakinu og ekki væri verra ef starfsmenn vinnustaða tækju sig saman og efndu til skemmtilegra leikja í tengslum við daginn!
